Gulnar Aafreen
dil ne ik aah bhari aankh men aansu aae
yaad gham ke hamen kuchh aur bhi pahlu aae
zulmat-e-shab men hai ru-posh nishan-e-manzil
ab mujhe raah dikhane koi jugnu aae
dil ka har zakhm tiri yaad ka ik phuul bane
mere pairahan-e-jan se tiri khushbu aae
tishna-kamon ki kahin pyaas bujha karti hai
dasht ko chhod ke ab kaun lab-e-ju aae
ek parchhain tasavvur ki mire saath rahe
main tujhe bhulun magar yaad mujhe tu aae
main yahi aas liye gham ki kadi dhuup men huun
dil ke sahra men tire pyaar ka aahu aae
dil pareshan hai ‘gulnar’ to mahaul udaas
ab zarurat hai koi mutrib-e-khush-khu aae
Leave a Reply