Dil Mein Rahe Wo shaKHs Ragon Mein Rawan Na Ho

dil meñ rahe vo shaḳhs ragoñ meñ ravāñ na ho

maiñ chāhtā huuñ zaḳhm-e-jigar kā nishāñ na ho

dastak sunī to ruuh kī chīḳheñ nikal ga.iiñ

jaise koī badan meñ jahāñ thā vahāñ na ho

ik umr ho ki jis meñ mayassar hoñ cigareteñ

ik dostī ho jis meñ ye sūd-o-ziyāñ na ho

ik ḳhush-kalām pūchhe tumheñ chāhiye sukūñ

ik ḳhush-kalām pūchhe magar mujh se haañ na ho

maiñ chāhtā huuñ ek ho bas ek ham-safar

aisā jo mere dil kī tarah bad-zabāñ na ho

Leave a Comment