dil men rahe vo shaḳhs ragon men ravan na ho
main chahta huun zaḳhm-e-jigar ka nishan na ho
dastak suni to ruuh ki chiḳhen nikal ga.iin
jaise koi badan men jahan tha vahan na ho
ik umr ho ki jis men mayassar hon cigareten
ik dosti ho jis men ye sud-o-ziyan na ho
ik ḳhush-kalam puchhe tumhen chahiye sukun
ik ḳhush-kalam puchhe magar mujh se haan na ho
main chahta huun ek ho bas ek ham-safar
aisa jo mere dil ki tarah bad-zaban na ho
Leave a Reply