Kunwar Mahendra Singh Bedi Sahar
dil liya hai to bevafa na bano
dard mat do agar dava na bano
ya navazo to lutf-e-paiham se
ya kisi ka tum aasra na bano
dil men hur-o-qusur hain har aan
shaiḳh uupar se parsa na bano
ashraf-ul-ḳhalq hai laqab us ka
pahle insan bano ḳhuda na bano
mudda.i ka na ho jo paas tumhen
phir kisi dil ka mudda.a na bano
ham vafadar hain rahenge bhi
na bano aap ba-vafa na bano
laaj rakh tu ‘sahar’ ke sajdon ki
but bano tum agar ḳhuda na bano
Leave a Reply