Jaan Nisar Akhtar
dil ko har lamha bachate rahe jazbat se ham
itne majbur rahe hain kabhi halat se ham
nashsha-e-mai se kahin pyaas bujhi hai dil ki
tishnagi aur baḌha laa.e ḳharajat se ham
aaj to mil ke bhi jaise na mile hon tujh se
chaunk uThte the kabhi teri mulaqat se ham
ishq men aaj bhi hai nim-nigahi ka chalan
pyaar karte hain usi husn-e-rivayat se ham
markaz-e-dida-e-ḳhuban-e-jahan hain bhi to kya
ek nisbat bhi to rakhte hain tiri zaat se ham
Leave a Reply