Dil Ki Aaraish-E-Alam Ka Tamasha Dekhe

Arsh Siddiqui

dil ki ara.ish-e-alam ka tamasha dekhe

gar kabhi ḳhud pe nazar jaa.e to sahra dekhe

aankh vo aankh jo har qatre men dariya dekhe

tu magar samne aa jaa.e to phir kya dekhe

ḳhvab men ho to ye dil dekhe tiri diid ke ḳhvab

ḳhvab se jaage to ik ḳhvab si duniya dekhe

jo samajhta hai ki khul jaata hai fariyad se baḳht

su-e-aflak kabhi haath vo phaila dekhe

ibtila men hain sabhi rah-rav-e-manzil-e-shauq

kis ko fursat ki mire paanv ka kanTa dekhe

‘arsh’ agar lafz-o-ma.ani ke ho tum paighambar

ek tasvir bana jaao ki duniya dekhe