Dil Ke Makan Mein Aankh Ke Aangan Mein Kuchh Na Tha

Poet

dil ke makan men aankh ke angan men kuchh na tha

jab gham na tha hayat ke daman men kuchh na tha

ye to zara batao hamen ahl-e-karvan

un rahbaron men kya hai jo rahzan men kuchh na tha

zulmat ka jab tilism na TuuTa nigah se

raushan hua ki dida-e-raushan men kuchh na tha

vo to bahar ka hamen rakhna paḌa bharam

varna ye vaqi.a hai ki gulshan men kuchh na tha

mujh par ba-taur-e-ḳhas thi us ki nigah-e-lutf

kahta main kis tarah mire dushman men kuchh na tha

ye bhi durust hai ki nasheman men barq thi

ye bhi ghalat nahin ki nasheman men kuchh na tha

‘fazil’ ruḳh-e-hayat pe yuun thiin masarraten

jaise gham-e-hayat ki uljhan men kuchh na tha