dil ka aalam bhi hua hai alam-e-hu ki tarah
aankh men tu har ghaḌi rahta hai aansu ki tarah
dil ke mausam men kabhi tabdiliyan aati nahin
lagti hai bad-e-saba bhi kankani lu ki tarah
ik tasavvur se tire mahka hai mera ang ang
tu mire ehsas men basta hai ḳhushbu ki tarah
saḳht kaali raat men ummid ka nanha diya
hai farozan dil men ik ma.asum jugnu ki tarah
vasl ka aalam ki jaise hon shafaq ki laliyan
hijr ka mahaul hai qurbat ke jaadu ki tarah
aa ga.i lafzon men bhi lahje ki talḳhi is qadar
aap bhi us ne kaha mujh ko magar tu ki tarah
dhuup men baiThi thi apne baagh men aur yuun laga
Tahniyan do shajar ki hain us ke baazu ki tarah
guftugu ka ik alag munfarid andaz hai
lafz us ke bolte hain jaise ghunghru ki tarah
us ko bhi har vaqt rahta hai talaffuz ka ḳhayal
ishq main ne bhi kiya hai us se urdu ki tarah
dekhte hi dekhte ‘ḳhanda’ guzar ja.egi umr
vaqt hathon se nikal ja.ega jugnu ki tarah
Leave a Reply