dil-jalon se dil-lagi achchhi nahin
rone valon se hansi achchhi nahin
munh banata hai bura kyuun vaqt-e-vaaz
aaj vaaiz tu ne pi achchhi nahin
zulf-e-yar itna na rakh dil se lagao
dosti nadan ki achchhi nahin
but-kade se mai-kada achchha mira
be-khudi achchhi khudi achchhi nahin
muflison ki zindagi ka zikr kya
muflisi ki maut bhi achchhi nahin
is qadar khenchti hai kyuun ai zulf-e-yar
le ke dil itni kaji achchhi nahin
aaen meri bazm-e-matam men vo kya
haath men menhdi rachi achchhi nahin
shaikh ko de do mai-e-be-rang-o-bu
us ki qismat se khinchi achchhi nahin
ik hasin ho dil ke bahlane ko roz
roz ki ye dil-lagi achchhi nahin
zarra zarra aftab-e-hashr hai
hashr achchha vo gali achchhi nahin
ahl-e-mahshar se na uljho tum ‘riyaz’
hashr men divangi achchhi nahin
Leave a Reply