dil ishq men tabah hua ya ki jal gaya
achchha hua ḳhalish ga.i kanTa nikal gaya
ulfat men us ki jaan ga.i dil bhi jal gaya
dushman ka do hi din men divala nikal gaya
dil apna us se mangne ko main jo kal gaya
ankhen nikalen laḌne ko fauran badal gaya
jalte hain ghair apna to matlab nikal gaya
qismat se baat ban bhi ga.i daav chal gaya
tarif-e-husn-e-yar ne is ko kya raqib
rahbar bhi beach raste men ham se badal gaya
karta huun arz un se jo chalne ki main kahin
kahte hain kya dimagh tumhara bhi chal gaya
bhari hai raat hijr ki bimar par tire
phir us ko ḳhauf kuchh nahin ye din jo Tal gaya
dushman ke naqsh-e-pa ko jo dete ho galiyan
piiTo lakir saanp to aaya nikal gaya
kis rang men vo rahte hain us ki ḳhabar nahin
mahfil men in ki aaj main pahle-pahal gaya
arman kya ga.e ki gaya dil bhi ishq men
ye vo jua hai jis men hamara mudal gaya
vo jalva-gah-e-naz ho ya bazm-e-ghair ho
jannat hamen vahin hai jahan dil bahal gaya
dushman bhi jan-nisar bane de ke apna dil
hairat hai mujh ko rupaya khoTa bhi chal gaya
anjam-e-ishq dekh liya apni aankh se
ab to safi’ dimagh ka tere ḳhalal gaya
Leave a Reply