Did Ki Tamanna Mein Aankh Bhar Ke Roe The

Bharat Bhushan Pant

diid ki tamanna men aankh bhar ke ro.e the

ham bhi ek chehre ko yaad kar ke ro.e the

samne to logon ke gham chhupa liye apne

aur jab hue tanha ham bikhar ke ro.e the

ham se in andheron ko kis liye shikayat hai

ham to ḳhud charaghon ki lau katar ke ro.e the

jab talak the kashti par ḳhud ko rok rakkha tha

sahilon pe aate hi ham utar ke ro.e the

aa.ine men rota vo aks bhi hamara tha

jis ko dekh kar akasr ham biphar ke ro.e the

yaad hai abhi tak vo ek shaam bachpan ki

jaane kya hua tha sab log ghar ke ro.e the

sahilon pe aati hai aaj bhi sada un ki

Dubne se kuchh pahle jo ubhar ke ro.e the

har taraf thi ḳhamoshi aur aisi ḳhamoshi

raat apne saa.e se ham bhi Dar ke ro.e the

tab pata chala ham ko zaḳhm kitne gahre hain

dard ke nashebon men jab utar ke ro.e the

ham ne apni ankhon se hadsa vo dekha tha

pattharon ki basti men zaḳhm sar ke ro.e the