dekhta huun phuul aur kanTe ba-har-su aaj bhi
yaad karta huun tiri ḳhushbu tiri ḳhu aaj bhi
jaane kyuun jalti sulagti shaam ke aivan men
phail jaati hai tiri baton ki ḳhushbu aaj bhi
ziist ke ḳhasta shikasta gumbadon men gah-gah
gunjta hai teri avazon ka jaadu aaj bhi
zulf kab ki atish-e-ayyam se kumhla ga.i
zulf ka saaya nahin Dhalta sar-e-mu aaj bhi
tu ne paane haath men jis par likha tha mera naam
vo sanobar lahlahata hai lab-e-ju aaj bhi
vo tira pal-bhar ko milna phir bichhaḌne ke liye
dil ki muTThi men hai is lamhe ka jugnu aaj bhi
muddaten guzrin magar ai dost tere naam par
Dol jaati hai mire dil ki tarazu aaj bhi
Leave a Reply