Poet
dekh tu kis qadar bhala dukh hai
shaam hote hi aa gaya dukh hai
dil ki divar par Tangi ankhen
dil ki dahliz par jama dukh hai
thak ke baiThi huun ek kone men
aur kamre men ghumta dukh hai
mujh se puchho na ḳhairiyat ka sabab
mere har dard ki dava dukh hai
zindagi to haqiqi ma.anon men
ḳhaak se ḳhaak par likha dukh hai
ya mire dushmanon ka dukh hai mujhe
ya miri astin ka dukh hai
haath kanon pe rakh liye main ne
kis qadar chup men chiḳhta dukh hai
mere hansne pe phir ‘muqaddas’ ji
aa ki mujh par baras paḌa dukh hai
Leave a Reply