Alam Khursheed
dekh raha hai dariya bhi hairani se
main ne kaise paar kiya asani se
nadi kinare pahron baiTha rahta huun
kya rishta hai mera bahte paani se
har kamre se dhuup hava ki yaari thi
ghar ka naqsha bigḌa hai nadani se
ab sahra men chain se soya karta huun
Dar lagta tha bachpan men virani se
dil pagal hai roz pasheman hota hai
phir bhi baaz nahin aata man-mani se
kam kam ḳharch karo varna ye jazbe bhi
be-vaq.at ho jaate hain arzani se
apna farz nibhana ek ibadat hai
‘alam’ ham ne sikha ik japani se
Leave a Reply