Daulat Mili Jahan Ki Nam-O-Nishan Mile

Darshan Singh

daulat mili jahan ki nam-o-nishan mile

sab kuchh mila hamen na magar mehrban mile

pahle bhi jaise dekh chuke hon unhen kahin

anjan vadiyon men kuchh aise nishan mile

baḌhta gaya main manzil-e-mahbub ki taraf

haa.il agarche raah men sang-e-garan mile

rona paḌa nasib ke hathon hazar baar

ik baar muskura ke jo tum mehrban mile

ham ko ḳhushi mili bhi to bas aarzi mili

lekin jo gham mile vo gham-e-javedan mile

baaqi rahegi hashr tak un ke karam ki yaad

mujh ko rah-e-hayat men jo mehrban mile

phir kyuun kare talash koi aur astan

vo ḳhush-nasib jis ko tira astan mile

ahl-e-sitam ki dil-shikani ka sabab hua

dil ka ye hausla ki gham be-karan mile

saaqi ki ik nigah se kaaya palaT ga.i

zahid jo mai-kade men mile naujavan mile

dair-o-haram ke log bhi darman na kar sake

vo bhi asir-e-kashmakash-e-in-o-an mile

nazren talash karti rahin jin ko umr-bhar

‘darshan’ ko vo sukun ke lamhe kahan mile