Dasht-E-Baran Ki Hawa Se Phir Hara Sa Ho Gaya

dasht-e-baran ki hava se phir hara sa ho gaya

main faqat khushbu se us ki taza-dam sa ho gaya

us ke hone se hua paida khayal-e-jan-faza

jaise ik murda zamin men baagh paida ho gaya

phir hava-e-ishq se ashuftagi khuban men hai

in dinon men husn bhi azar jaisa ho gaya

hai kahin mahsur shayad vo haqiqat ahd ki

jis ka rasta dekhte itna zamana ho gaya

gham raha hai haal kahna dil ka us but se ‘munir’

jis ke gham men apne dil ka haal aisa ho gaya

Leave a Comment