dard jab se dil-nashin hai ishq hai
is makan men kuchh nahin hai ishq hai
dekh dasht-e-yad ka e.ajaz dekh
main kahin huun tu kahin hai ishq hai
thak ke baiTha huun jo kunj-e-zat men
mehrban koi nahin hai ishq hai
jo azal se hijrati hain ashk hain
jo in ashkon men makin hai ishq hai
ai sarab-e-jabr-o-istibdad sun
ye jo pyason ka yaqin hai ishq hai
kal jahan divar hi divar thi
ab vahan dar hai jabin hai ishq hai
ḳhvab hi men dekh le tabir-e-ḳhvab
kaun aisa pesh-bin hai ishq hai
jite-ji dushvar kitna tha safar
ab na duniya hai na diin hai ishq hai
ranj-o-gham ki surma.i chadar ‘taqi’
jab se bala-e-zamin hai ishq hai
Leave a Reply