Poet
dard-e-dil vo hai ki rahat se sarokar nahin
taqat-e-sabr nahin quvvat-e-guftar nahin
tegh-e-abru ko sambhalo main jhukaun gardan
jaan dene se to jan-baz ko inkar nahin
duun main kis chiiz se tashbih tahayyur hai mujhe
surat-e-gul to mira zakhm-e-dil-e-zar nahin
kaisi mushkil men phansaya hai mohabbat ne mujhe
baithna jabr hai aur taqat-e-raftar nahin
kis liye main dil-e-sad-chak rakhun pahlu men
gesu-e-yar ko shane se sarokar nahin
dil vo kis ka hai nahin jo tire qadmon pe nisar
kaun hai vo jo tira talib-e-didar nahin
dahr-e-fani men pareshan hai saari khilqat
aisa koi hai jo majmu-e-afkar nahin
nakhun-e-dasht-e-jununn dekhiye kya karta hai
daman-o-jeb-o-gareban men koi taar nahin
gar vahan jaao ‘jamila’ to ye kahna us se
go main kahida huun par ishq tira baar nahin
Leave a Reply