Sufi
dara raha hai mujhe ek dar andhere men
bichhad na jaae kahin ham-safar andhere men
umadti kaali ghataon ko rokna hoga
na duub jaae kahin dopahar andhere men
karo na mere liye tum koi diya raushan
mujhe ab aane laga hai nazar andhere men
kai charaghon ne udham machai thi ik shab
tabhi se duub gaya ghar ka ghar andhere men
vo apni zaat men ik chand hai pa vaqt-e-sahar
main apni zaat men jugnu huun par andhere men
har aadmi nikal aata hai khol se bahar
koi bhi rahta nahin mo’atabar andhere men
charagh valon ke sab daave khokhle nikle
main kar raha huun musalsal safar andhere men
‘kamal’ daal do tum kude-dan men un ko
charagh jalte nahin hain agar andhere men
Leave a Reply