Asim Wasti
daman-e-gul men kahin ḳhaar chhupa dekhte hain
aap achchha nahin karte ki bura dekhte hain
ham se vo puchh rahe hain ki kahan hai aur ham
jis taraf aankh uThate hain ḳhuda dekhte hain
kuchh nahin hai ki jo hai vo bhi nahin hai maujud
ham jo yuun mahv-e-tamasha hain to kya dekhte hain
log kahte hain ki vo shaḳhs hai ḳhushbu jaisa
saath shayad use le aa.e hava dekhte hain
zaviya dhuup ne kuchh aisa banaya hai ki ham
saa.e ko jism ki jumbish se juda dekhte hain
is qadar tazgi rakhi hai nazar men hamne
koi manzar ho purana to naya dekhte hain
ab kahin shahr men ‘asim’ hai na ‘ghalib’ koi
kis ke ghar jaa.e ye sailab-e-bala dekhte hain
Leave a Reply