Sarwar Nepali
chand nikle na kahin yaar purane nikle
koi kambaḳht mira dil to jalane nikle
gham-e-nazuk ko tabassum ne kiya parda-nashin
ashk dushman ki tarah raaz batane nikle
main to bas sard hava khane ko chhat par aaya
vo bhi sukhe hue kapḌon ko uThane nikle
us ka gham tha ki mire dil pe sulaiman ki mohr
ashk nikle ki ye moti ke ḳhazane nikle
mujh pe sahra men bhi ik sang kisi ne phenka
mere aage to ye majzub siyane nikle
daur-e-hazir ke suḳhan-saz hain kis ujlat men
sub.h divan kaha shaam chhapane nikle
phir se betab hai us chand ka paara paara
haa.e vo chand to ungli ko nachane nikle
mushk-e-nepal ne aalam se masha.iḳh khinche
khodi miTTi to ka.i dafan ḳhazane nikle
teri galiyon ka pata mushk se malum kiya
phir usi or ka.i bigḌi banane nikle
Leave a Reply