but-parasti ne kiya ashiq-e-yazdan mujh ko
parda-e-kufr men hasil hua iman mujh ko
ab dar-e-andazi-e-aghyar nahin chal sakti
ḳhuub pahchante hain yaar ke darban mujh ko
ḳhal-e-ruḳh ḳhizr-e-rah-e-kufr na hota jo tira
daam men la hi chuke the ye musalman mujh ko
jis men kuchh hoti hai ummid-e-visal-e-ma.asuq
itni khalti nahin vo gardish-e-dauran mujh ko
ye na ma.alum tha is rang se aa.egi bahar
tauba-e-mai ne kiya saḳht pasheman mujh ko
ishq ne mansab-e-ushshaq jo taqsim kiye
baagh bulbul ko diya kucha-e-janan mujh ko
dil-jala main huun vo ashiq ki shab-e-hijr ‘qalaq’
sham.a bhi rone lage dekh ke giryan mujh ko
Leave a Reply