Salim Saleem
bujhi bujhi hui ankhon men goshvara-e-ḳhvab
so ham uTha.e hue phirte hain ḳhasara-e-ḳhvab
vo ik charagh magar ham se duur duur jala
hamin ne jis ko banaya tha isti.ara-e-ḳhvab
chamak rahi hai ik avaz mere hujre men
kalam karta hai ankhon se ik sitara-e-ḳhvab
main ahl-e-duniya se masruf-e-jang ho ja.un
ki pichhli raat mila hai mujhe ishara-e-ḳhvab
ajab nahin miri ninden bhi jal uThen is baar
daba hua mire bistar men hai sharara-e-ḳhvab
Leave a Reply