bu-e-gul chahte hain raqs-e-saba chahte hain
band kamron ke makin taaza hava chahte hain
muflisi hosh uḌa deti hai insanon ke
ye nasha kam ho to daulat ka nasha chahte hain
kab kaha ham ne kisi zohra-jabin ki hai talash
jo hamen DhunD sake us ka pata chahte hain
ye bhi manzur nahin chand ke bashindon ko
ham ghani raat men miTTi ka diya chahte hain
ham se naraz hain suraj ki shua.en to rahen
ham to bas raushni-e-ghar-e-hira chahte hain
sab ko milta hai ye andaz-e-faqirana kahan
ham pareshan hain magar sab ka bhala chahte hain
jin ka sar dekh ke kaase ka guman ho ‘ma.asum’
vo bhi is daur men dastar-e-ana chahte hain
Leave a Reply