Moin Shadab
bojh ḳhvabon ka un ankhon se bahut Dhoya tha
aur phir main bhi natije men lahu roya tha
dukh men shirkat ka yaqin ho bhi use to kaise
dil se roya tha main ankhon se nahin roya tha
dekh kar fasl andheron ki ye hairat kaisi
tu ne kheton men ujala hi kahan boya tha
gum agar suui bhi ho jaa.e to dil dukhta hai
aur ham ne to mohabbat men tujhe khoya tha
jiit is baar bhi kachhve ki hui hairat hai
dauḌ men ab ke to ḳhargosh nahin soya tha
jism nasuron se sajna hi tha tum ne ‘shadab’
paTTiyan dhoi thiin zaḳhmon ko kahan dhoya tha
Leave a Reply