Daniyal Tareer
bila-javaz nahin hai falak se jang miri
aTak ga.i hai sitare men ik patang miri
phir ek roz mire paas aa kar us ne kaha
ye oḌhni zara qaus-e-quzah se rang miri
jo ka.enat kinare se ja ke mil jaa.e
vahi faragh-talab hai zamin tang miri
main chiḳhte hue sahra men duur tak bhaga
na jaane ret kahan le ga.i umang miri
fana ki surḳh dopahron men raqs jaari tha
ragen nichoḌ rahe the rabab-o-chang miri
lahu ki buund giri raushni ka phuul khila
phir us ke ba.ad koi aur thi tarang miri
Leave a Reply