Urooj Qadri
bhari bazm men gul-fishan aur bhi hain
hamare siva nukta-dan aur bhi hain
ye duniya to miT jaane vaali hai lekin
zamin aur bhi asman aur bhi hain
ye duniya to ik zarra-e-muḳhtasar hai
makin aur bhi hain makan aur bhi hain
na tanha mira karvan raah men hai
rah-e-ishq men karvan aur bhi hain
na ho mutma.in ek patthar haTa kar
ki raste men sang-e-giran aur bhi hain
agar ji lage aap ka to suna.un
fasane ka.i bar-zaban aur bhi hain
kaho bijliyon se ki barsen musalsal
abhi baagh men ashiyan aur bhi hain
‘uruj’ apne goshe se bahar to niklo
ki bahar hazaron jahan aur bhi hain
Leave a Reply