Be-Sabab Muskura Raha Hai Chand

be-sabab muskura raha hai chand

koi sazish chhupa raha hai chand

jaane kis ki gali se nikla hai

jhenpa jhenpa sa aa raha hai chand

kitna ghaza lagaya hai munh par

dhuul hi dhuul uda raha hai chand

kaisa baitha hai chhup ke patton men

baghban ko sata raha hai chand

sidha-sada ufuq se nikla tha

sar pe ab chadhta ja raha hai chand

chhu ke dekha to garm tha matha

dhuup men khelta raha hai chand

Leave a Comment