Shafiq Saleemi
be-nam dayaron se ham log bhi ho aa.e
kuchh dard the chun laa.e kuchh ashk the ro aa.e
kuchh paas na tha apne bas aas liye ghume
ik umr ki punji thi so us ko bhi kho aa.e
tauhin-e-ana bhi ki tahsin-e-riya bhi ki
ye bojh bhi Dhona tha ye bojh bhi Dho aa.e
ik kar-e-numu barson karte rahe bin soche
ham biij mohabbat ke sahraon men bo aa.e
pahchan ka har manzar anjan hua aḳhir
lagta hai ka.i sadiyan ik ghaar men so aa.e
Leave a Reply