naz-butt

Be-Khabar Hote Hoe Bhi Ba-Khabar Lagte Ho Tum

be-khabar hote hoe bhi ba-khabar lagte ho tum

duur rah kar bhi mujhe nazdik-tar lagte ho tum

kyuun na aauun saj sanvar kar main tumhare samne

khush-ada lagte ho mujh ko khush-nazar lagte ho tum

tum ne lams-e-mo’tabar se bakhsh di vo raushni

mujh ko meri arzuon ki sahar lagte ho tum

jis ke saae men amaan milti hai meri ziist ko

mujh ko jalti dhuup men aisa shajar lagte ho tum

kyuun tumhare saath chalne par na amada ho dil

khushbu-e-ehsas mere ham-safar lagte ho tum

‘naz’ tum par naaz karti hai mohabbat ki qasam

zindagi bhar ki duaon ka asar lagte ho tum

More Poems

Leave a Comment