Barasti Aag Se Kuchh Kam Nahin Barsat Sawan Ki

barastī aag se kuchh kam nahīñ barsāt sāvan kī

jalā kar ḳhaak kar detī hai dil ko raat sāvan kī

uThī haiñ kaalī kaalī badliyāñ kyā tum na aaoge

guzar jā.egī kyā tanhā bharī barsāt sāvan kī

kisī kī yaad aatī hai liye ashkoñ kī tuġhyānī

milī hai jholiyāñ bhar kar hameñ sauġhāt sāvan kī

Dagar sunsān bijlī kī kaḌak pur-haul tārīkī

musāfir raah se nā-āshnā barsāt sāvan kī

tumhāre muntazir rahte haiñ sāvan ke hasīñ jhūle

kiyā kartī hai yaad aksar tumheñ barsāt sāvan kī

tahī-dastī kā aalam jām-e-mai saaqī na paimāna

ye kis ne chheḌ dī aise meñ ‘rahbar’ baat sāvan kī

Leave a Comment