ban ke ḳhushbu vo basa hai mujh men
har nafas mauj-e-saba hai mujh men
hai tasavvur men koi mast-e-ḳhiram
ik qayamat si bapa hai mujh men
taqat-e-jumbish-e-pa ho ki na ho
himmat-e-laghzish-e-pa hai mujh men
dil men ik tiir tarazu ho kar
dard ko tol raha hai mujh men
koi arman na nikla ab tak
ek mela sa laga hai mujh men
hasb-e-har-jabr-e-mashiyat ‘aḳhgar’
vasf-e-taslim-o-raza hai mujh men
Leave a Reply