baKHsha Gaya Hai Dil Ko Wo Saman-E-Agahi

baḳhshā gayā hai dil ko vo sāmān-e-āgahī

hairat-kada hai dahr ba-unvān-e-āgahī

aa.ī bahār jaib-o-garebāñ pe haath hai

ho jaa.e taar taar na dāmān-e-āgahī

ik vahm hai ki paañv meñ Daale hai beḌiyāñ

ik azm hai ki kuchh nahīñ zindān-e-āgahī

nai mausam-e-bahār hai nai bād-e-kū-e-yār

mahkā gayā hai kaun shabistān-e-āgahī

dil munharif ḳhayāl-e-ġhalat pur-havas nigāh

dushman bane hue haiñ bahī-ḳhvān-e-āgahī

īmān muzmahil hai aqīdat lahū lahū

ho jaa.e paash paash na īqān-e-āgahī

tūfān-e-tund-o-tez sahī dekhte raho

bujhne na paa.e sham.a farozān-e-āgahī

Leave a Comment