baḳhsha gaya hai dil ko vo saman-e-agahi
hairat-kada hai dahr ba-unvan-e-agahi
aa.i bahar jaib-o-gareban pe haath hai
ho jaa.e taar taar na daman-e-agahi
ik vahm hai ki paanv men Daale hai beḌiyan
ik azm hai ki kuchh nahin zindan-e-agahi
nai mausam-e-bahar hai nai bad-e-ku-e-yar
mahka gaya hai kaun shabistan-e-agahi
dil munharif ḳhayal-e-ghalat pur-havas nigah
dushman bane hue hain bahi-ḳhvan-e-agahi
iman muzmahil hai aqidat lahu lahu
ho jaa.e paash paash na iqan-e-agahi
tufan-e-tund-o-tez sahi dekhte raho
bujhne na paa.e sham.a farozan-e-agahi
Leave a Reply