baja ki naqsh-e-kaf-e-pa pe sar bhi rakhna hai
magar buland maqam-e-nazar bhi rakhna hai
saḳhavat aisi dikha.i ki ghar luTa baiThe
na socha ye bhi ki kuchh apne ghar bhi rakhna hai
hon zaḳhm zaḳhm kahan tak main charagar se kahun
idhar bhi rakhna hai marham udhar bhi rakhna hai
ye jabr dekho ki rahna bhi hai sar-e-maqtal
har ek vaar bhi sahna hai sar bhi rakhna hai
rah-e-hayat men thakna bhi hai yaqini sa
phir apne aap ko vaqf-e-safar bhi rakhna hai
ilahi ḳhair ki tufan-e-bad-o-baran men
hamen bachana hai ḳhud ko bhi ghar men rakhna hai
ye kya sitam hai ki sayyad ham asiron ko
riha bhi karna hai be-bal-o-par bhi rakhna hai
kise bata.en ki gham us ki be-niyazi ka
vo gham hai jis se use be-ḳhabar bhi rakhna hai
musafiro abhi manzil ke hain paḌav bahut
isi hisab se zad-e-safar bhi rakhna hai
ye uzr hai ki unhen niind aane lagti hai
bayan-e-qissa-e-gham muḳhtasar bhi rakhna hai
‘vaqar’ tum suḳhn-o-agahi se guzre ho
tumhi ko pas-e-‘vaqar’-e-hunar bhi rakhna hai
Leave a Reply