badan ka kaam thoḌa hai magar mohlat ziyada hai
so jo ghaflat ziyada thi vahi ghaflat ziyada hai
hamen is alam-e-hijran men bhi ruk ruk ke chalna hai
unhen jaane diya jaa.e jinhen ujlat ziyada hai
na jaane kab kisi chilman ka ham nuqsan kar baiThen
hamen chehra-kusha.i ki zara ruḳhsat ziyada hai
kabhi main ḳhud ziyada huun tan-e-tanha ki vahdat men
kabhi meri zarurat se miri vahdat ziyada hai
tujhe halqa-ba-halqa khinchte phirte hain duniya men
so ai zanjir-e-pa yuun bhi tiri shohrat ziyada hai
ye dil bahar dhaḌakta hai ye aankh andar ko khulti hai
ham aise marhale men hain jahan zahmat ziyada hai
main qarnon ki tarah bikhra paḌa huun donon vaqton men
miri jalvat ziyada hai miri ḳhalvat ziyada hai
so ham fariyadiyon ki ek apni saf alag se ho
hamara mas.ala ye hai hamen hairat ziyada hai
Leave a Reply