Jaleel Manikpuri
baat saaqi ki na Taali ja.egi
kar ke tauba toḌ Daali ja.egi
vo sanvarte hain mujhe is ki hai fikr
aarzu kis ki nikali ja.egi
dil liya pahli nazar men aap ne
ab ada koi na ḳhali ja.egi
aate aate aa.ega un ko ḳhayal
jaate jaate be-ḳhayali ja.egi
kya kahun dil toḌte hain kis liye
aarzu shayad nikali ja.egi
garmi-e-nazzara-bazi ka hai shauq
baagh se nargis nikali ja.egi
dekhte hain ghaur se meri shabih
shayad us men jaan Daali ja.egi
ai tamanna tujh ko ro luun sham-e-vasl
aaj tu dil se nikali ja.egi
fasl-e-gul aa.i junun uchhla ‘jalil’
ab tabi.at kuchh sambhali ja.egi
Leave a Reply