agar meri jabin-e-shauq vaqf-e-bandagi hoti
to phir mahshur un ke saath apni zindagi hoti
jo tasvir-e-khyali naqsh dil par ho gai hoti
to apni zaat men har-dam tiri jalva-gari hoti
raza-e-dost par qurban jis ki har khushi hoti
haqiqat men usi ki gham se khali zindagi hoti
nigah-e-mast-e-saqi se jo mai-khvaron ne pi hoti
yaqinan hashr tak un ko na phir tishna-labi hoti
husul-e-dard-o-gham ki koshishon men gar kami hoti
surur-o-kaif ki lazzat kahan mujh ko mili hoti
mujhe vo baton baton men agar divana kah dete
to divanon men meri mo’atabar divangi hoti
tire mashq-e-sitam hi ne kisi qabil kiya mujh ko
tera ehsan varna zindagi kis kaam ki hoti
tumhara aaina ban kar jo dil pesh-e-nazar rahta
tumhin tum jalva-gar hote na surat dusri hoti
tasavvur hi ke aalam men jo vo taklif farmate
to kyuun furqat-nasibon ke liye shab hijr ki hoti
agar teri tarah tabligh karta pir-e-mai-khana
to duniya-bhar men vaaiz mai-kashi hi mai-kashi hoti
tumhari be-niyazi ko gharaz kab hai magar meri
tamanna hai jabin-e-shauq vaqf-e-bandagi hoti
hayat-o-maut ka paigham deta har-nafas ‘vasil’
kabhi ru-posh vo hote kabhi jalva-gari hoti
jo maabudan-e-batil ki jahan men sarvari hoti
muqabil haidari ke past kyuun kar marhabi hoti
Leave a Reply