Altaf Hussain Hali
baat kuchh ham se ban na aa.i aaj
bol kar ham ne munh ki khaa.i aaj
chup par apni bharam the kya kya kuchh
baat bigḌi bani bana.i aaj
shikva karne ki ḳhu na thi apni
par tabi.at hi kuchh bhar aa.i aaj
bazm saaqi ne di ulaT saari
ḳhuub bhar bhar ke ḳhum lunDha.i aaj
ma.asiyat par hai der se ya rab
nafs aur shara men laḌa.i aaj
ghalib aata hai nafs-e-dun ya shar.a
dekhni hai tiri ḳhuda.i aaj
chor hai dil men kuchh na kuchh yaaro
niind phir raat bhar na aa.i aaj
zad se ulfat ki bach ke chalna tha
muft ‘hali’ ne choT khaa.i aaj
Leave a Reply