Shahram Sarmadi
ba-nam-e-ishq ik ehsan sa abhi tak hai
vo sada-lauh hamen chahta abhi tak hai
faqat zaman o makan men zara sa farq aaya
jo ek mas.ala-e-dard tha abhi tak hai
shuru-e-ishq men hasil hua jo der ke ba.ad
vo ek sifr tah-e-hashiya abhi tak hai
hulul kar chuki ḳhud men hazar naqsh o rang
ye ka.enat jo ḳhaka-numa abhi tak hai
tavil silsila-e-maslahat hai chaar taraf
yaqin kar le miri jaan ḳhuda abhi tak hai
Leave a Reply