Shuja Khaavar
asar men dekhiye ab kaun kam nikalta hai
idhar se tegh udhar se qalam nikalta hai
firaq men to nikalti thi jaan vaise bhi
par aaj vasl men hairat se dam nikalta hai
khaḌa hua hai adu ka muamla aise
bayan kiije to pahlu-e-dam nikalta hai
main roz jis ke taghaful ka rona rota huun
vo shaḳhs ghaur se dekhe to dam nikalta hai
jo daam milte hain becho mata-e-fan ko ‘shuja’
ye maal in dinon vaise bhi kam nikalta hai
Leave a Reply