Asar Mein Dekhiye Ab Kaun Kam Nikalta Hai

asar meñ dekhiye ab kaun kam nikaltā hai

idhar se teġh udhar se qalam nikaltā hai

firāq meñ to nikaltī thī jaan vaise bhī

par aaj vasl meñ hairat se dam nikaltā hai

khaḌā huā hai adū kā muāmla aise

bayān kiije to pahlū-e-dam nikaltā hai

maiñ roz jis ke taġhāful kā ronā rotā huuñ

vo shaḳhs ġhaur se dekhe to dam nikaltā hai

jo daam milte haiñ becho matā-e-fan ko ‘shujā’

ye maal in dinoñ vaise bhī kam nikaltā hai

Leave a Comment