Bedam Shah Warsi
apni hasti ka agar husn numayan ho jaae
aadmi kasrat-e-anvar se hairan ho jaae
tum jo chaho to mire dard ka darman ho jaae
varna mushkil hai ki mushkil miri asan ho jaae
o namak-pash tujhe apni malahat ki qasam
baat to jab hai ki har zakhm namakdan ho jaae
dene vaale tujhe dena hai to itna de de
ki mujhe shikva-e-kotahi-e-daman ho jaae
us siyah-bakht ki raten bhi koi raten hain
khvab-e-rahat bhi jise khvab-e-pareshan ho jaae
sina-e-shibli-o-mansur to phunka tu ne
is taraf bhi karam ai jumbish-e-daman ho jaae
akhiri saans bane zamzama-e-hu apna
saz-e-mizrab-e-fana tar-e-rag-e-jan ho jaae
tu jo asrar-e-haqiqat kahin zahir kar de
abhi ‘bedam’ rasan-o-dar ka saman ho jaae
Leave a Reply