apne hone ki ihanat nahin ham kar sakte
so tiri yaad se ghaflat nahin ham kar sakte
dil men laate nahin dushman se bhi nafrat ka ḳhayal
is se kam koi ibadat nahin ham kar sakte
duur rahte hain takabbur ki hava se lekin
ijz ko ghafil-e-ghairat nahin ham kar sakte
maslahat sahar bahut phunkti phirti hai bhare
kam qad-o-qamat-e-vahshat nahin ham kar sakte
Dher tafrih-e-tan-o-jan ke laga do jitne
tark ik dard ki daulat nahin ham kar sakte
chhoḌ sakte hain ye sab sehn-o-dar-o-bam-e-jahan
qariya-e-ḳhvab se hijrat nahin ham kar sakte
tum zamin par jo ḳhuda bante chale jaate ho
kya samajhte ho baghavat nahin ham kar sakte
jis ravish bhi ho ravan ghol-e-zamana ‘ali’
aap se koi ri.ayat nahin ham kar sakte
Leave a Reply