Wajeeh Sani
apne andaz men auron se juda lagte ho
tum pujari nahin lagte ho ḳhuda lagte ho
kis qadar maan se roka tha use jaane se
jis ne puchha hai javaban mire kya lagte ho
nichi nazren kiye simTe hue ghabra.e hue
tum mujassam kya kahen us ko haya lagte ho
achchhi lagti ho mujhe tum kya tumhen main achchha
na-mukammal tha saval us ne kaha lagte ho
mujh se chhin jaoge tum dil ko ye ḳhadsha bhi nahin
kis ne chhini hai dua tum to dua lagte ho
kya ho tum dhuup ki surat kabhi aa chubhte ho
aur kabhi tez kabhi narm hava lagte ho
Leave a Reply