Saleem Figar
andhere ko nigalta ja raha huun
diya huun aur jalta ja raha huun
miri har samt ye saa.e se kyuun hain
main jaise din huun Dhalta ja raha huun
dhuan sa phailta jaata huun bujh kar
hadon se ab nikalta ja raha huun
zaval-e-adamiyyat dekh kar main
kaf-e-afsos malta ja raha huun
mujhe to TuTna hai hashr ban kar
na jaane kyuun main Talta ja raha huun
main zinda huun ka.i sadiyon ab tak
faqat chehre badalta ja raha huun
Leave a Reply