Aks Hai Be-Tabiyon Ka dil Ki Armanon Mein Kyun

Afsar Merathi

aks hai be-tabiyon ka dil ki armanon men kyuun

be-zaban shamil hue jaate hain mehmanon men kyuun

ho gae divane rukhsat bastiyon ki samt kya

chha gaiin viraniyan si phir bayabanon men kyuun

dil ki us be-raunaqi ka zikr jaane dijiye

ho rahi hain bastiyan tabdil viranon men kyuun

hai raqabat juzv-e-lazim mehr-o-ulfat ka agar

ijtimai ishq phir hota hai parvanon men kyuun

kya kisi kutiya ke andar jaag uthi hai zindagi

khalbali si pad gai mahlon men aivanon men kyuun

bikh-kun the jo sitam-ranon ke kal tak ai nadim

ho raha hai ab shumar un ka sitam-ranon men kyuun

amn ke khvahan hain jab ‘afsar’ jahan vaale tamam

kashmakash rahti hai phir itni jahan-banon men kyuun