aish se kyuun ḳhush hue kyuun gham se ghabraya kiye
zindagi kya jaane kya thi aur kya samjha kiye
nala-e-be-tab lab tak aate aate rah gaya
jaane kya sharmili nazron se vo farmaya kiye
ishq ki ma.asumiyon ka ye bhi ik andaz tha
ham nigah-e-lutf-e-janan se bhi sharmaya kiye
naḳhuda be-ḳhud faza ḳhamosh sakit mauj-e-ab
aur ham sahil se thoḌi duur par Duuba kiye
vo hava.en vo ghaTa.en vo faza vo us ki yaad
ham bhi mizrab-e-alam se saz-e-dil chheḌa kiye
muḳhtasar ye hai hamari dastan-e-zindagi
ik sukun-e-dil ki ḳhatir umr bhar taḌpa kiye
kaaT di yuun ham ne ‘jazbi’ rah-e-manzil kaaT di
gir paḌe har gaam par har gaam par sambhla kiye
Leave a Reply