Ahmad Ata
ai miyan kaun ye kahta hai mohabbat ki hai
baat ye hai ki yahan baat zarurat ki hai
phir koi chaak gareban liye phirta hai
hazrat-e-ishq ne phir koi shararat ki hai
bas yunhi ek hayula sa nazar aaya tha
aur phir dil ne dhadakne ki jo shiddat ki hai
vo miri chaah ka vaise bhi talabgar na tha
phir mire dil ne sambhalne men bhi ujlat ki hai
ham bahut duur chale aae hain basne ko ‘ata’
is se pahle bhi bahut duur se hijrat ki hai
Leave a Reply