Ali Manzoor Hyderabadi
ai kashmakash-e-ulfat ji saḳht pareshan hai
marne ki bhi hasrat hai jiine ka ka bhi arman hai
sahil se nahin lagti gharqab nahin hoti
kashti hai thapeḌon men ye bhi koi tufan hai
main kya miri ulfat kya tu aur mujhe puchhe
bas ai sitam-ara bas hasrat hai na arman hai
ye mauj-e-tabassum kya zalim ise dho degi
jo rang-e-pashemani chehra se numayan hai
maghrur-e-mohabbat huun ḳhud meri nigahon men
ye be-sar-o-samani raz-e-sar-o-saman hai
is husn-e-mujassam ki sharmili adaon ka
ehsas-e-mohabbat bhi sharminda-e-ehsan hai
‘manzur’ use ruḳhsat kis dil se karunga main
dhaḌka hai yahi har dam jab se ki vo mehman hai
Leave a Reply