Agar Faqir Se Milna Hai To Sambhal Pahle

agar faqir se milna hai to sambhal pahle

amiir ban ke na ja pairahan badal pahle

paḌegi tujh pe sunahri kiran mohabbat ki

harim-e-zat ke jangal se ḳhud nikal pahle

salam kahne ko aaegi ḳhud-baḳhud manzil

mohabbaton ke kaThin raston pe chal pahle

jaTaen kanch ke bande to ḳhuub hain lekin

tu ḳhvahishon pe bhi jogi bhabhut mal pahle

shumar tera bhi hoga kamal valon men

kisi kamal ke sanche men tu bhi dhal pahle

tire payam hi se surḳh ho gaya hai badan

ki menh paḌa nahin hai khil uThe kanval pahle

suḳhan-varon ki riyazat pe phir gaya paani

sunai shoḳh nigahon ne vo ghazal pahle

hile na honT na ankhon ne lab-kushai ki

jabin-e-husn pe kyuun paḌ gae hain bal pahle

tujhe salam kare uTh ke kis tarah ‘hasrat’

tu aaya der se aur aa gai ajal pahle

Leave a Comment