adavaton men jo ḳhalq-e-ḳhuda lagi hui hai
mohabbaton ko koi bad-dua lagi hui hai
panah deti hai ham ko nashe ki be-ḳhabari
hamare biich ḳhabar ki bala lagi hui hai
kamal hai nazar-andaz karna dariya ko
agarche pyaas bhi be-intiha lagi hui hai
palak jhapakte hi ḳhvahish ne canvas badla
talash karne men chehra naya lagi hui hai
tu aftab hai jangal ko dhuup se bhar de
tiri nazar mire ḳheme pe kya lagi hui hai
ilaaj ke liye kis ko bula.iye sahab
hamare saath hamari ana lagi hui hai
Leave a Reply