Rashmi Saba
achanak samne vo aa gaya to
palaT de mera har ik faisla to
musalsal azmate ja rahe ho
agar nikla kabhi vo bevafa to
jala karti hai jis ke saath shab bhi
vo taara jalte jalte bujh gaya to
falak ki be-ruḳhi se tang aa kar
zamin ne kar liya kuchh faisla to
mira saaya jo mujh se kho gaya tha
kisi din raah chalte mil gaya to
hava se baat karti titliyon ko
koi ik tez jhonka le uḌa to
‘saba’ dariya ka dil bhi jhuum uTTha
kisi ka naam paani par likha to
Leave a Reply